Vittorio Peri, il professore che parlava friulano e portava gioia nel mondo culturale

Ferruccio Tassin dipinge la figura dell'intellettuale goriziano spentosi nel 2006, esponente di spicco del panorama culturale regionale.

Cuant che al rivava all’ICM Vittorio Peri - al Professôr - al partava la bugada di ligria dai zovins. No l’fevelava mai di sé; par cognossilu, si à duvût lêi al so curriculum senza fin, preparât cun metodo, e come se l’ foss di un altri. A Guriza (nassût tal 1932) la zoventût; a Milan (Universitât Catolica) al veva cjapât su al savê, samenât in tun teren di gala. A Roma, cuaranta àins come Scriptor Graecus ta Biblioteca Vaticana, studiôs, inteletuâl, cun tuna marea di studis, di grandis fondis e di larg zîr; mai alc che no l’foss cun daûr da spalis dut ze che l’era scrit su la cuestion. Par lui, la storia come cognossinza, e clâf par lâ di là di separaziôns che vevin segnât li epochis; bon di capî la dimension profetica da politica come postuladôr da causa di beatificazion di Zorz la Pira.

Al faseva part - unic laic tai trenta comissaris da Glesia Catolica - da Comission Mista Internazionâl pal Dialic Teologic fra la Glesia Catolica e la Glesia Ortodossa. Comissari dal Comitât pai Studis Bizantins da Santa Sede (Pontifizi Comitât di Sienzis Storichis) ta Associazion Internazionâl di Studis Bizantîns, l’à ciapât part, come reladôr a una vora di congress sientifics nazionâi e internazionâi, par solit rapresentant, in maniera uficiâl, la Santa sede o la Biblioteca Apostolica Vaticana.

Ogni slarg dal savê, indulà che lui al indagava, l’ era alc di un progjet intîr: superâ se che al divideva, fasi siôrs di dut se che l’era diferent, ma rispietalu. Che al foss al scisma da Glesiis dal Orient; minoranzis da Europa di Miez; nassi da archidiocesi di Guriza; cuestion culturâl furlana, la olma morâl da sô coerenza, era simpri chê, part ativa da vita gleseastica generada dal Concili Vatican II, strenta ta letera apostolica di Zuan Pauli II (31 di dizembar 1980, su la opara dai Sants Ciril e Metodi): “…Mi auguri, duncia, che par opera da misericordia da Trinitât Santissima, par intercession da mari di Diu e di duç i Sants, a sparissi chel che al divîd li Glesiis, come ancia i popui e li naziôns; e ze che le diferent di tradiziôns e di cultura a dimostrin invezit la integrazion di una banda e di chê altra di una ricieza che je di insieme…”.

Si à dit chist, no tant par via che nol sedi cognossût, ma par fâ capî di ze banda che ven una indagine di valôr su la nestra cultura fulana. Pi di un “doi di copa” al bradascia che al fevelâ furlan, e al viodi i Furlans come popul, al sedi un esercizi di plui, una piardita di timp, inveze di integrasi in tuna cultura che ciapi drenti al mond intîr cun tuna lenga universâl. Lui cà, come in altris bandis, al fâs capî che identitât a intind al confront e lu insiora. Fonda da nestra cultura al resta al so studi “Notis su la formazion da identitât culturâl furlana”, scrit par dagi confuart sientific al sintî di un altri grand Furlan e om di cultura universâl, pre Guido Maghet.

Cun pre Guido (al don al tradusè un pâr di articui in furlan su “Int Furlane”), si à mot banda dôs direziôns: fâ intindi che la lenga furlana veva dignitât, ni plui ni mancul, di chês altris lenghis, e (cun rispiet) che la Conferenza Episcopal Taliana no veva una rason, che foss una, par dineagila (la à propi implombada). Ricuardinsi che similes cun similibus facillime congregantur ta stratosfera di Maghet e di Peri; ta grandezza popolâr di pre Guido e da so int, e tal nadâ drenti pantan di chei che cojonin al nestri popul par via che l’è pizul, e che no l’è bon di fâ tonâ li sclopis e fâ conziarts cul tritolo par dî che l’è su chista tiara.  Se i Furlans a esistin, che sepin: a vin vût chista int e che gi domàndin i soi dirits (no la caretât) a duç chei che ju governin o che la contin di governaiu. Di lui e da sô opera, l’è za stât scrit, ma si dovaran scrivi anciamò peraulis meditadis. Noaltris si lu ricuardìn cul so zuf di cjavei, sprolungiâts in tuna plea ribela; al so fevelâ plen di savôr e di rigôr tal modulâ ideis e tirâ frecis.

Fra li lenghis “gurizzanis”, al doprava, tal tornâ, al furlan cu la finâl in -e dal Cormonês. Alora, di gnôf un “mandi”, e graziis al Professôr, par essi stât pi di una cuarta parsora di chei altris e di no vegilu mai fat pesâ a di nissun!

Rimani sempre aggiornato sulle ultime notizie dal Territorio, iscriviti al nostro canale Telegram, seguici su Facebook o su Instagram! Per segnalazioni (anche Whatsapp e Telegram) la redazione de Il Goriziano è contattabile al +39 328 663 0311.