La storia di Slavenka e Milan, internâta tal cjamp di concentrament fassist di Visc

Il racconto in friulano di Ferruccio Tassin che ripercorre, nella Giornata della Memoria, alcune pagine dolorose della storia locale.

Al somearess un titul dramatic di una storia par comovi cui cha al cjala, inventada di un di chêi cjantastoriis, che lavin di paîs in paîs, fasint, a voltis, dal dolôr spetacul. Inveze a son storiis sintudis a contâ propi dai protagoniscj. Oramai 30 àins fa, mi rivà una telefonada di Osôf, paîs famôs pai fats dal 1848. Un zovin, Moreno Venchiarutti, mi telefonava disint che sô mari a veva recuperât la memoria leìnt al me libri “sul Confine dell’Impero”; al sens l’era che nissun gi crodeva che jê foss stata in cjamp di concentrament a Visc tal 1943, gi disevin che no, in Friûl erin grandis casermis, ma no cjamps di concentrament.

Chê era roba dai naziscj. Ma je insisteva fin cuant àn dovût dagi rason. Soi lât a cjatala e alora mi soi ricuardât che je, dopo dal teremot dal 1976 gi veva dati di mangjâ e di durmî a siôr Toni Faleschin, un vecjo mestri, apassionât di furlan e di storia. Si sintarin a una taula e je mi contà la sô storia. Milan, inveze lu ài cjatât par cumbinazion (cumò al sta a Lubiana). Laureât in farmacia, consilîr di Stât in Slovenia, l’era tornât a Visc par tornâ a viodi al lûc di dolôr dal so timp di infanzia daûr dai reticolâts (lui e la sô famea).

Prima sin lâts tal zimiteri a viodi la lapide (forsi prima e unica in Italia) mituda tai Àins Zincuanta dal Comun di Visc in ricuard dal 25 muarts tal cjamp di concentrament; dopo sin lâts là da caserma par cjalâ di fûr i lûcs da sô presonia. Lui no l’ saveva al talian e jo no savevi al sloven: vin fevelât in todesc. La storia da sô vita mi la à mandada dopo, scrita in sloven. La ài fata voltâ par talian, cussì cumo al cjantastoriis lu foi jo. Chista je una storia scomenzada tal 1941, cuant che una fantata croata di 17 àins, Slavenka Ujdur, si nacuarz che la vita gi scjampa, imbalsamada, fûr dal timp.

Scomenza a Gradac, in Dalmazia, cul so arest (colaborazioniscj dal ocupadôr talian). Al fradi in uera; al pari, Jure, 48 àins, arestât, al doventa blanc di cjavêi in tun lamp. Preson pa sûr Nede (21 àins); pi tard, al capita ancia pa mari Ana (38) e pai fradis Perica e Senka (8 e 6 àins!). Insieme cun 5 frutatis (fra i 19 e i 23 àins), una femina dongia dal 50, altris oms dal paîs, ven partada in barcia ta presôns di Metcovič su la Neretva, e a Kolocep, ta presôns da forteza di Dubrovnik; in camion, a Prevlaka (Montneri); i muarts di Mamola, presôns orendis; viaz di bestiis in barcia banda Flum; i cjars dal besteam pal trasferiment a Palmagnova …

Di là, a Visc, tal cjamp di concentrament. In Jugoslavia ancia la violenza (i compains di sventura pocâts), timp di privaziôs; da no esisti, leâts insieme a dîs e gnots daûr dai reticolâts: la fan, il no essi plui femina tal fisic… Un lamp di umanitât: un ufiziâl al zuiava cun tuna fruta; sintiments che no someavin esisti tal cûr di un nemì... Al pi difizil l’era capî parzè.

Li zornadis gi corevin daûr a li zornadis, simpri compagnis. In gjonda dome dopo al 8 di setembar: i portôns dal cjamp si spalancarin; dopo lungis, lentis colonis di umanitât dolorosa e umiliada, sula strada dal tornâ, plena di fadiis. Ains e ains plui tard, gi disevin che al cjamp di Visc no l’era stât; no savevin, no podevin crodi… Al 21 di otobar dal 2000 a torna drenti in chel lûc, par viodi; un mac di rosis in zimiteri, un in glesia, par chêi che erin muarts dal dut. Par jê, erin muarts 3 àins, forsi di plui; ricuards plêns di dolôr, che dome al timp al riva a bonâ.

A Osôf, zoncjada (cui sôi) dal teremot tal 1976, Slavenka gi dà una man a cui che l’è plui surtunât di jê. No odèa; à sposât un talian.
Viveva cui sôi fioi, dulà che la campagna si confond cul bosc, in riva al Tajament, ta ombra da “rupes Osopi”, cjantadis di S. Paulin di Aquilea. Anciamò plui tenera la storia di Milan; 7 àins in Slovenia, dongia di Lubiana; prima (1941), la ocupazion taliana somea senza dureza; lui al impara ancia cualchi peraula di talian; dopo, cjasa brusada (acusa di essi partigjâns), insieme cun altris cjasis da so paîs.

Tapis di lûc in lûc, fin a Monigo (Trevîs); là murin 228 personis e tancj fruts e frutis, di pôs mês e di pôs àins! Cun Milan son la mari, un fradi e dôs sûrs; il pari e il fradi plui grand son tal infiar di Arbe (fra i 1000 e i 1500 muarts, i plui par fan!), dopo al pari al larà a Gonars e al fradi cun lôr a Visc. Al cjamp di Visc “…v enne costruito dall’intendenza d’armata, ma, appena costruito, passò alle dipendenze del comando di corpo d’armata di Trieste; ne era comandante il tenente colonnello dei carabinieri Bonfiglio…”.

L’ordin al riva tal dizembar dal 1942: dovevin preparalu par 10.000 personis. Al repart che l’era lì al va a Palma. Lu sielzin par via che erin za 17-18 costruziôns fatis di mûr. I lavôrs lavin pa lungis e alora al gen. Giglio al va sul puest al 17 di zenar dal 1943 e al descrîf la situazion siarant cussi la letera: “…Tutti i lavori, malgrado le poche ore lavorative dovute alle intemperie della stagione e alle giornate corte, vennero effettuati in modo quasi completo, in circa un mese, tanto che, il 20 febbraio 1943 il campo venne occupato dai primi mille internati che trovarono in esso ogni possibile conforto… [l’espression a podaress sunâ come un cjoli via! N.d.A.].

Par dâ una idea di ze mût che si nunziava al rivâ di gnova int, e di ze che al contava l’ om, ve cà un fonogramma da Direzion Traspuarts: “Sono giunti oggi pomeriggio a Fiume 435 internati civili via nave da Castelnuovo di Cattaro. At ore 19.56 partiranno per ferrovia diretti at Visco Palmanova”, sicché un lung viaz senza respîr. Il gen. Umberto Giglio, in tuna letera di pôc prima, al veva dât cualchi consei; un pa le vitimis plui inozentis di prepotenzis da gjenar: “… riunire i bambini durante varie ore del giorno in apposito recinto [propi ‘recinto’, n. d. A.] e locale per essere intrattenuti in giochi ed istruzioni in relazione alla loro età”.

Milan ai 22 di marz dal 1943 al veva finût 8 àins tal cjamp di Monigo. Rivarin a Visc lui, la mari Maria, al fradi Ivan (al finiss 6 àins al dì di S. Pieri patrono di Visc) e li dôs sûrs. Al riva di Arbe al fradi Joze e no coventa contâ in ze condiziôns. Vignaran liberâts dopo dal 25 di luj e al pari dopo al 8 di setembar 1943. Ancia sul sfuei dai fruts la monotona ripetitivitât da burocrazia a scrîf che “il luogo di cattura” l’è stât Begunje. A scjadenâ chist l’era stât al stess demoni dal nazionalisim che al veva viodût internâ ancia la nestra int ta granda uera cuant che tal 1915 a rivarin i “liberadôrs”!

Dai internats di Visc son muarts in 25: 22 tal cjamp e 3 tasl ospedâl di Palma. Certificâts di muart a contin ancia di deperiment organic! Par furtuna, no son muarts fruts e par capî che la umanitât no si era distudada dal dut, leìn un toc di una letera dal cjapitani miedi Jusef Castelbarco Albani a mons. Mirko Brumat, dal comitat di socors dai internâts slovêns: “… mancano farine alimentari per bambini e sovratutto Mellin per divezzamento e per correggere nei lattanti artificialmente ai primi mesi.

Non abbiamo nessuna dotazione, ed il sottoscritto stesso à provveduto personalmente ad acquistare qualche flacone di Mellin facendo piccola opera di beneficenza…le anime buone del Goriziano, le mamme sopratutte potranno più di me, pensando ai loro bambini, comprendere quanto bene si può fare in tanto dure contingenze per le piccole innocenti creature altrui…”.

Son stâts ancia altris segnos di solidarietât: un murador (a fasevin su la glesia) al puartà cualchi toc di pan e di savon; contadins butavin di là da rêt verduris, un frut di in chê volta al contà che li nonis gi racomandavin di preâ par chei fruts là drenti… un uardian no l’ denunzià internâts cjapâts a roseâ blava in tun cjamp dongia. Milan si veva nacuart che ancia a Visc, fra li barachis, dulà che corevin li pantianis, prima la tiara a veva un’altra funzion: al vodè nassi plantutis di forment; lui no lu à dit, ma forsi al viodeva e al sintiva la speranza! 

Rimani sempre aggiornato sulle ultime notizie dal Territorio, iscriviti al nostro canale Telegram, seguici su Facebook o su Instagram! Per segnalazioni (anche Whatsapp e Telegram) la redazione de Il Goriziano è contattabile al +39 328 663 0311.